Segun gobierno di Reino e minimo sosial ta e montante minimo ku un hende mester pa por sobreviví. E minimo sosial ta tambe e fundeshi di e lucha kontra pobresa. Na Hulanda ya pa basta aña e minimo sosial ta formalmente fihá i na vigor pa soltero, parehanan kasá i tambe pa parehanan ku ta biba huntu. E salario minimo na Hulanda ta igual na e minimo sosial pa parehanan kasá òf pa e parehanan ku ta biba huntu. E benefisionan sosial na Hulanda na nan turno tambe ta mará na e minimo sosial. Asina por garantisá un bida digno pa esnan empleá I desempleá.

Na Hulanda Karibense esaki ta hopi otro. E gráfiko ta ilustrá e situashon mas kla. A kompará e minimo sosial i e salario minimo na Hulanda ku e situashon na Boneiru. E montantenan a wòrdu kombertí na dollar kontra e tarifa di kambio $ 1.19 pa 1 euro.

Despues di años di manda señalnan i traha hopi rapòrt riba e pobresa teribel ku ta eksistí na e munisipionan Karibense di Hulanda (Boneiru, Statia i Saba) i despues di preshon persistente di e parlamento, a kalkulá pa e munisipionan aki na 2019 e minimo sosial pa diferente kasnan di famia. Na Boneiru a bin resultá ku mas ku mitar di e kasnan di famia tin un entrada bou di e minimo sosial ku a keda kalkulá. Apesar di esaki a move e fundeshi di e lucha kontra pobresa, un minimo sosial ofishalmente fihá, pa futuro komo un punta na horizonte. Tan ten ku no tin un fundeshi, e posishon pa e “working poor” y pa hendenan ku ta kobra solamente AOV lo no drecha. No tin motibu étiko òf sosial ekonomiko pa hustifiká e diferensha entre posishon di e hendenan na Hulanda Karibense i na Hulanda.

Medio 2019 Hulanda a bòltu e realidat. En bes di un minimo sosial basá riba kostonan real a fiha e minimo sosial basá riba “ijkpunten”(puntanan di salida) abou i irealistiko. Ijkpunten ku ta sali for di e punto di bista ku kostonan di bida lo bai baha konsiderabelmente. Bahada ku mester wòrdu lográ ku medidanan proyektá pa gobiernu. E medidanan di gobiernu, ku eksepshon di algun medida pa gruponan limitá, a keda posponé den 2021 ni sikiera a alkansá e planifikashon.
E punta na horizonte no tin fin di yega serka. Pa Boneiru e minimo sosial kalkulá ta 45% te 50% mas haltu ku lo kual a wordu inventá na 2019.

Na Hulanda e sueldo minimo ta 37% mas haltu ku e minimo sosial pa un soltero. Na Boneiru e sueldo minimo ta 34% mas abou ku e minimo sosial kalkulá. Ta pesei un trahadó soltero na Boneiru trahando “full time” falta tur luna mas ku mitar di su sueldo minimo pa por kumpli ku su obligashonnan. No tin un reda soshal pa yuda den e kaso aki.

Ku redukshon di e gastunan anhelá ku un dia den un futuro insegur lo wòrdu realisá, e “working poor” awendia no por paga su hür, Koriente, awa i komestibel. Manera konosí esaki pa años ta tin konsekuensia sosial serio pa hopi famia ku ta bibando den pobresa i den kual muchanan tin ku lanta den kondishonnan miserabel. A bira tempu pa mira e realidat i kambia e maneho. E “ijkpunt” mester bai horizonte i e minimo sosial real mester wòrdu realisá mas lihé posibel.

Unkobon ta hasi un yamada na tur esnan konserní na Boneiru i na Hulanda pa, awó
si, ban traha duru pa mas lihé ku ta posibel fiha un minimo sosial realistiko pa Boneiru.