Relato di Prensa 17-10-2021

UNKOBON ta un organisashon ku ta sali na interes di su miembronan pero tambe na e interes di tur konsumidó aki na Boneiru. Gran parti di e miembronan di Unkobon ta Boneriano. Tin hopi habitante ku a nase na Hulanda i Estados Unidos ku tambe ta miembro. Tur habitante di Boneiru di 18 aña di edat òf mas por bira miembro di Unkobon pa solamente $ 15,00 pa aña.

Nos lema ta ku union por logra hopi. Ta pesei for di lantamentu di Unkobon na 2012, Unkobon a traha huntu ku Fundashon Tienda pa Konsumidó Boneiru na e interes di tur konsumidó. Den prinsipio Sr. Alex Senchi tabata presidente di e Fundashon Tienda pa Konsumidó i mas despues Sra. Jolanda Daflaar. Algun logro den koperashon ku Fundashon Tienda pa Konsumidó i OLB tabata den 2014 unda ku den palabrashon ku e organisashon di supermerkadonan a realisá e proyekto Bon Kompra.

Den luna di ougustus 2018 a inisiá ku e proyekto Komparashon di Preis. Esaki tabata un inisiativa di e ministerio EZK. E proyekto aki a keda realisá ku koperashon di: EZK,  RCN, Unkobon i Fundashon Tienda pa Konsumidó. E proyekto aki a keda finansiá pa EZK.

Ku e plaka di EZK, Unkobon a kontraktá Sra. Orphaline Saleh, direktor di Sage b.v., pa ehekutá e proyekto di Komparashon di Preis I paga e opserbadornan lokal. RCN a perkurá pa tur fin di  luna publiká e resultado di e Komparashon di Preis den korantnan lokal. Fundashon Tienda pa Konsumidó lo a perkurá pa duna publisidat pa e proyekto aki via di nan programa radial. E proyekto Komparashon di Preis a stòp den luna di mart 2020 na momentu ku OLB a anunsiá un paro di preis riba artikulonan di primera nesesidat.

Inisio di 2021 Unkobon kier a kuminsá bèk ku e proyekto Komparashon di Preis pero esaki no a logra komo ku un kantidat di supermerkadonan no ta kier a koperá mas ku e proyekto.

Den luna di desember 2019 Unkobon a yuda Tienda organisá un agasaho pa Sr Ewald Abdul, ku despues di 7 aña a tuma retiro for di Fundashon Tienda pa motibunan personal. Direktiva di Fundashon Tienda no ta tin e medionan nesesario pa a duna e despedida aki un toke festivo.  Unkobon a bula’den pa duna Ewald tòg loke e meresé. Miembronan di direktiva di Fundashon Tienda tabata presente na e agasaho aki.

Unkobon ta lamentá ku resientemente e presidente di Fundashon Tienda den un reunion di Konseho Insular i tambe via di un programa na radio a ekspresá su mes negativamente riba Unkobon. Ex presidente, Sr  Eric Booi, un boneriano outéntiko, ta lamentá profundamente e akusashon ku Unkobon a kita trabou for di Fundashon Tienda i ku Unkobon ta un organisashon di estranhero ku ta sali solamente na interes di hulandesnan. E akusashonnan aki ta falsu i leu for di berdat si tuma nota di e logronan ku Unkobon a logra durante e ultimo añanan na interes di e konsumidónan aki na Boneiru.

Despues ku Ewald Abdul no tabata den servisio di Fundashon Tienda pa Konsumidó mas, direktiva di Unkobon a hasi diferente intento pa sinta na mesa ku direktiva di Fundashon Tienda p’asina mira kon kontinuá ku e koperashon. Despues ku den dos okashon Fundashon Tienda a kanselá e reunion, Unkobon a laga e inisiativa na Fundashon Tienda pa papia riba kontinuashon di e koperashon. E inisiativa ei lastimamente no a wòrdu tumá ainda.