Den e buletin aki: Unkobon ta kondoler Marianne Grutters; vakatura;  Fundashon Mini kredito; kolaborashon ku Fundashon Tienda pa Konsumidó Bonaire; desaroyo kaso hudisial; di dos reunion general di Bondsraad; sera konosí ku Hose Booi.

Kondolensia
Inesperadamente Zoë, yu hòmber di Marianne Grutters, a fayesé durante un ehersisio militar na Hulanda prinsipio di september 2023. Kousa di su fayesimentu ainda no ta konosí. Zoë ta tin 31 aña di edat. Direktiva i boluntarionan di Unkobon ta ekstendé nan palabra di kondolensia na Marianne i ta deseá Marianne i demas famia hopi forsa ku e pèrdida sensibel aki. 

Vakatura den direktiva di Unkobon
Si tin miembro ku tin interes pa okupá e funshon interesante di sekretario/sekretaria den direktiva di Unkobon, por drenta den kontakto ku señor Herbert Piar na telf +599 7825772

Fundashon Mini Kredito
Unkobon ta tin un kombèrsashon kòrtiku ku Minister De Jonge tokante kreashon di un fundashon ku lo bai duna mini krédito na siudadanonan ku entrada abou i ku pa tal motibu no ta bin na remarke pa un krédito na banko. Meta di e mini krédito aki ta pa brinda e siudadanonan aki e posibildat pa terminá konstrukshon di nan kas òf pa konstruí nan propio kas. Minister De Jonge a haña esaki un hopi bon idea i a referí Unkobon na e minister di BZK ku huntu ku OLB i Unkobon lo elaborá pa realisá e plan aki. “Esaki nos mester realisé gewon” segun Minister De Jonge.

Kolaborashon ku Fundashon Tienda di Konsumidó Bonaire (FTpKB)
Pa atendé más mihó posibel interes di e konsumidónan na Boneiru. Unkobon a uni forsa ku Fundashon Tienda di Konsumidó Bonaire. Intenshon ta pa reuní un biaha kada kuartal.

Desaroyo kaso hudisial relashoná ku minimo sosial
Prinsipio di desember 2022 abogado di Unkobon a entregá e emplasamentu na gobiernu Hulandes. Fin di aprel 2023 e a risibí di Estado Hulandes, 192 página konteniendo kontesta unda por konkluí ku Estado Hulandes ta tratando e kaso di minimo sosial pa islanan BES i ku nan tin e libertat pa laga tratamentu di e kaso aki dura largu.

Dia 23 di november próksimo lo tin e promé seshon den korte na Den Haag. Lo trata e reseptividat di Unkobon. Si korte disidí ku Unkobon ta reseptivo lo tin planeá den e promé kuartal di 2024 un seshon ku kontenido.

Mientras tantu Unkobon ta mantené su preshon riba e ketel polítiko. E luna aki lo publiká e rapòrt di Komishon Thode. Apesar di kaída di gobiernu hulandes, Tweede Kamer no a deklará e implementashon di minimo sosial pa islanan BES komo kontravèrsial. Komo tal e miembronan di Tweede Kamer ainda por disidí pa implementá un minimo sosial pa islanan BES den 2024. 

Fecha pa e di dos reunion general di Bondsraad
Dia 15 di novèmber 2023 lo tin e di dos reunion general di Bondsraad. Por fabor reservá e fecha aki. Tur miembro di Unkobon ta keda kordialmente invitá na e reunion aki ku lo kuminsá pa 7or di anochi. Sitio i e puntonan di agenda lo wòrdu anunsiá despues.

Sera konosí ku Hose Booi
Hosé a nase i krese na Boneiru. Despues di un bishita na e laboratorio di St.Franciscus Hospitaal, aktual Mariadal, Hosé a keda fasiná pa e mikroskop. Uzando e mikroskop e a mira sélulanan tantu blanku komo kòrá den sanger. Esaki a fasiné asina tantu ku, despues di a terminá su MAVO,  e a skohe pa bai studia pa analista na Kòrsou.

Na Kòrsou Hosé a drenta servisio di Landslaboratorium, aktual Analysticsch Diagnose Centrum (ADC). Na 1979 Hosé a wòrdu transladá pa e sukursal di Landslaboratorium na Boneiru despues di a finalisá e estudio pa analista.

Na 1995 e a risibí e enkargo di Gobiernu di Antias Hulandes pa finalisá e estudio di Master Biokímika na Hulanda. Su kasá i yunan mientras tanto a keda biba na Boneiru. Hose faltando dos aña pa kaba e estudio, a laga nan bin biba serka dje na Den Haag. Hulanda. Bèk na Boneiru, Hosé a bira manager di ADC kual despues a independisá bira Bonlab. Na 2008 Hosé a bira e promé direktor di Bonlab.

Na 2009 Landslaboratorium St.Maarten a bira independiente i Hosé a solisitá pa un posishon den e direktiva i a keda nombrá pa un periodo di 5 aña. E plan tabata pa despues baha ku penshun. Na 2014 bahamentu ku penshun sinembargo, mester a wanta un ratu komo ku a resultá ku nan ta tin mester di dje pa un djòp na Saba i Statia.

Na 2015 a presentá di nobo un djòp na ADC Kòrsou; tabata no mas ku despues di esaki ku Hosé por a baha ku penshun. Na 2020 su penshun a ser interumpí komokiera ku Hose a haña un posishon den direktiva di Bonlab pa akreditá Bonlab. Na 2021 Hosé a logra akreditá e parti médiko di Bonlab. Na 2022 Hosé a akreditá e laboratorio di awa. Na 2023 despues di a logra e akreditashonnan menshoná, Hosé por fin por a bai goza di su penshun bien meresí i tambe bai goza di su kunuku.

Su kasá mientras tantu tambe a baha ku penshun i su dos yunan muhé a terminá nan estudio i ta trahando, un di nan na Hulanda i e otro na Boneiru.

Banda di laboratorio Hosé tabata representante di Boneiru den e “Landelijke Raad van de volksgezondheid” di Antias Hulandes, miembro di Rotary Club Bonaire. miembro di Rotary Club St.Maarten, miembro di krus kòrá Boneiru.

Awó ku e ta ku penshun Hosé kier bai sirbi komunidat di Boneiru komo miembro di direktiva di UNKOBON. Aki Hose lo bai yuda boluntarionan di Unkobon, usando su kapasidat i eksperensia, pa den un forma strukturá buska solushon di problemanan andando.