Limitá oumento di preis!

Entrante yanüari 2024 sueldo mínimo ta bai subi konsiderabelmente. Pa e forsa di kompra i pa ekonomia di Boneiru ta deseabel ku oumento di preis keda limitá té loke ta nesesario pa kubri e oumento di gastunan salarial. E limitashon aki ta un tarea komun den kua tantu e empresario komo gobiernu i e konsumidó na Boneiru, tin un ròl.

UNKOBON ta hasi un yamada na Gobiernu di Boneiru, na Kámara di Komersio i na e empresanan pa tuma akshon nesesario den kua oumento di preis por keda limitá te ku loke ta en realildat nesesario.

 

  1. Informashon na empresarionan
    Serka hopi empresario ainda no ta kla kon oumento di e sueldo mínimo ta bai wòrdu kompensá pa gobiernu di Reino i kua otro medida fiskal ta bai perkurá pa oumentá e forsa di kompra. Aki tin un tarea pa gobierrnu lokal i pa Kámara di Komersio pa informá e empresarionan oportunamente i tambe pa suministrá informashon korekto.
  2. Helpdesk pa empresarionan
    Tin empresario ku tin mester di mas informashon òf ayudo tèkniko en torno oumento di sueldo mínimo, areglo di kompensashon òf kalkulashon di preis. Un oumento di gastunan salarial ku por ehèmpel 20% no ta nifiká ku preisnan tin subi outomátikamente ku 20%. UNKOBON a desaroyá un modelo simpel (https://rb.gy/ohsps4) di kalkulashon ku ta proposhoná informashon di e influensha ku oumento di gastonan salarial mester por tin riba e preisnan.
    UNKOBON ta pidi Kámara di Komersio pa instalá un helpdesk unda e empresario ta risibí informashon tokante konsekuensia ku oumento di e salario mínimo tin pa su empresa i tambe unda e empresario por risibí ayudo den tumamentu di desishon pa determiná e márgen.
  3. Asistensha na konsumidó
    Si no manehá e oumento salarial bon, e risiko pa kai den mas debe ta grandi. Den kuadro di esaki gobiernu di Boneiru tin un tarea hopi importante. Banda di informashon amplio kon manehá plaka responsabel, mester ofresé tambe asistensha individual na hopi hende.

Sentral pa notifiká oumento di preis
E konsumidó mester por notifiká un oumento di preis haltu. UNKOBON ta pidi gobiernu lokal pa instalá un sentral unda e konsumidó por señalá oumento di preis ku den su bista ta inhustu.
Empresanan di kual notifikashonnan a drenta lo keda aserká pa aklarashon i ofresé yudansa. Organisashonnan manera Fundashon Tienda pa Konsumidó i UNKOBON por tin un ròl importante basta ku tin finansiamentu pa esaki.
Un kos ta sigur. No pa tur sektor oumento di sueldo mínimo ta kondusí na oumento di preis. Esaki ta dependé entre otro di parti di e gastunan salarial den e preisnan. Den hopi sektor komersial e sueldo mínimo mas haltu no tin òf kasi no tin influensha (entre 0% i 2%)  riba e preisnan. Den un kantidat limitá di sektor manera por ehempel den sektor di limpiesa e influensha lo ta relativamente grandi. Kompanianan ku oumentá e preisnan konsiderabelmente tin duna splikashon pa esaki. Tira falta riba e oumento di salario mínimo, komo e motibu, no ta konta.

  1. Medida pa korehí preis
    Si merkansia òf servisio keda ofresé na sierto preis ku por papia di un konflikto di interes públiko, gobiernu lokal mester tuma medida korektivo.
  2. Responsabilidat sosial empresarial
    Konsenshi sosial di e empresa ta garantisá ku e empresarionan ta asumí e responsabilidat sosial empresarial. Kompanianan tin e responsabilidat pa na un manera aseptabel atendé e situashon relashoná ku oumento di sueldo mínimo. Empresarionan ku, hasta despues di a risibí yudansa tèkniko, keda persistí di abusá i hasi mal uso di e situashon, por konta riba un publisidat negativo.

 

Sueldo mínimo ta bai subi den yanüari di $ 1.236,00 té $ 1.570,00 pa luna. Un enorme adelanto pa speshalmente e empleadonan ku ta risibiendo e sueldo minimo konforme lei, Komo ku e suma liber di impuesto tambe a subi, e hendenan aki ta bai risibí nèto $  334.00 mas pa gasta. Penshonadonan tambe ta bai konsiderabelmente dilanti den entrada. Personanan ku ta risibí nan AOV kompleto  ta bai risibí $ 288,00 mas pa por konsumí. Den luna di yüli benidero lo tin e siguiente oumento.

 

Debí na e enorme oumento di forsa di kompra, volumen di e nigoshinan, for di febrüari próksimo, lo oumentá konsiderabelmente.

Si limitá subimentu di preis té loke ta estriktamente nesesario, lo surgi un kresementu fuerte i real di e ekonomia lokal. Di e forma aki tur hende ta sali ganá (win-win).

Deel dit