Konsumidónan ta eksihí klaridat tokante e paro di prèis riba komestibel

Relato pa prensa 12 di mei 2020
Konsumidónan aki na Boneiru tin hopi pregunta tokante e paro di prèis ku ta aplikabel pa e mini-i supermerkadonan.

Dia 20 di mart último, pa medio di un medida di urgensha, gobièrnu a dekretá un paro di prèis riba 71 produkto den supermerkadonan. Apesar ku e medida aki tin 7 siman bieu, ainda e preisnan máksimo di e 71 produkto, menshoná riba e lista, no a wòrdu publiká. E dekreto “paro di preis Boneiru 2020” tampoko no a wòrdu adaptá ainda pa asina tin klaridat ku e paro di preis ta konta pa tur mini-y supermerkadonan òf solamente pa e 16 supermerkadonan menshoná den e promé dekreto.

Tin hopi pregunta tokante e medida aki.  Segun e presidente di UNKOBON, Sr. Eric Booi, preis di mesun produkto ta varia den e supermerkadonan. Konsumidónan ta puntra nan mes kon nan por kontrolá si e supermerkado ta tene su mes na e paro di preis. Tin kontrol di parti di gobièrnu?

Segun presidente di Unkobon si un medida no ta wòrdu kontrolá, esaki tin tiki of ningun balor. Lo ta bon pa OLB publiká e prèisnan máksimo di moda ku e konsumidó més por kontrolá si un supermerkado ta tene su mes na esaki.