Xu Sheng firme den top 5

Pa supermerkadonan chikí ta difisil pa por tin e produktonan barata konstantemente den stòk. Si riba e dianan ku ta nota e prèisnan, ta e produktonan karu so ta presente, esakinan lo wòrdu notá den e komparashon di prèis. Xu Sheng sa di logra mantené e prèis di e produktonan básiko konstantemente bou di e promedio di tur e supermerkadonan.

Warehouse ta keda indiskutibel e supermerkado mas barata aki na Boneiru. Wing Cheung ya pa basta luna ta okupá e di dos lugá. Karibe Nobo ta menasando pa konkistá e di dos lugá. Den luna di yuni na Karibe Nobo, karni y e produktonan ku remplasá karni, tabata mas barata. Den e kategoria aki Wing Cheung a sali nr dos.

Riba e website di Unkobon.org e konsumidónan tin un bista di tur e prèisnan y tambe informashon di e supermerkadonan ku ta partisipá. E ‘spreadsheet’ ku informashon general ta kontené e detayenan di e preisnan inkluí den e kalkulashon. Hasiendo esaki e konsumidó por mira na kua supermerkado e produkto di e makutu básiko ta mas kombiniente.

Ku e proyekto di komparashon di prèis aki, Unkobon y Fundashon Tienda pa Konsumidó kier konsientisá e konsumidó aki na Boneiru kon presupuestá y gasta menos pa produktonan básiko. Den e proyekto aki Unkobon y FTpKB ta traha huntu ku EZK, RCN y Sage BV.

Spòtlait