Komparashon di preis ougústús 2019

Proyekto komparashon di prèis ta eksistí un aña fin di ougústús 2019
Fin di ougústús 2018 a publiká e promé resultado di e proyekto komparashon di prèis. Ku publikashon di e Komparashon di Preis e luna ougústús 2019 aki, ta marka 1 aña ku ta publiká esaki tur luna.

Diesinku supermerkado aki na Boneiru ta partisipá na e proyekto aki. Mensualmente ta nota prèis di 60 produkto básiko na e supermerkadonan aki. Ta kompará e prèisnan aki pa asina yega na un lista di klasifikashon.

Meta di e proyekto aki ta pa konsientisá e konsumidó riba e diferenshanan di prèis den e supermerkadonan. Pagando bon tinu riba prèis di produktonan pa konsumí, e konsumidó ta skapa sèn ora di hasi kompras.

Hopi konsumidó ta haña ku gobièrnu mester pone un prèis máksimo riba sierto produkto. Sinembargo si esaki sosodé, e pregunta grandi lo ta si esaki lo kondusí na un nivel di prèis redusí generalmente. Realidat ta ku medidanan asina ta stroba merkado liber pa funshoná bon i no ta benefisiá e konsumidó.  Ku merkado liber, supermerkadonan por kompetí ku otro stipulando prèisnan mas abou. Si e konsumidó skohe pa e supermerkado ku e mihó prèis e otro supermerkadonan tambe lo bai adaptá nan prèis.

Un otro meta di e proyekto “komparashon di prèis” ta pa krea mas transparensha di moda ku e konsumidó por skohe konsientemente pa e prèis mas kumbiniente. Hasiendo esaki e konsumidó mes ta influenshá funshonamentu di e merkado.

Na inisio di e proyekto pa kompará prèis a tene un enkuesta bou di e konsumidónan aki na Boneiru pa tin un midí di konosementu di konsumidó na punto di salida (‘nulmeting’). Den luna di yüli 2019 a tene e di dos enkuesta pa asina mira si e konsumidónan konosé i ta hasi uzo di resultado di e proyekto komparashon di prèis i tambe pa Unkobon haña un indikashon di e efekto.

Ku resultado di e enkuestanan lo hasi un evaluashon pa asina disidí ku lo kontinuá den 2020 ku e proyekto “komparashon di prèis”.

Durante e un aña di eksistensha di e proyekto por a nota basta movehon riba e lista di klasifikashon. Warehouse Bonaire a mantené e promé lugá durante henter aña. Ultimo lunanan no a bin kambio den e top 5. Remarkabel ta, ku tin menos diferensha entre e supermerkado mas karu i esun mas barata

Esaki pa motibu ku e supermerkadonan a amplia nan inbentario ku produktonan mas ekónomiko. Asina e konsumidó tin mas eskoho i por skohe e produkto ku mihó prèis.

Den luna di ougústús aki e diferensha entre nr. 1 Warehouse Bonaire i nr. 2 Wing Cheung a baha konsiderabelmente. Den luna di yüni 2019 e diferensha den e indèks tabata 15 punto. Den luna di ougústús esaki ta 5 punto. E otro supermerkadonan ku a subi di posishon riba e lista ta: New World Minimarket na Antriol, Zhung Kong Supermarket na Hato, Dragon City Supermarket na Antriol, van den Tweel Supermarket i Jia Xing Supermarket na Nikoboko Nòrt.

Riba e wèpsait www.unkobon.org por mira tantu e lista di e komparashon di prèis komo e “spreadsheet” ku tur prèis y informashon di e supermerkado partisipante. Tambe por mira fasilmente kua supermerkado tin e produkto mas barata di den e makutu.

Spòtlait