komparashon di prèis yuli 2019

Prèis di berdura y fruta ta sigui subi

Despues ku frontera ku Venezuela a keda será, por a nota den luna di mart y aprel un oumento (14%) di prèis di berdura y fruta aki na Boneiru. Den luna di mei tabata parse ku e prèisnan lo a stabilisá. Sinembargo den luna di yüni y yüli e prèisnan di fruta y berdura a subi drástikamente. E makutu di fruta y berdura tabata den luna di yüli 17% mas karu ku den luna di yanüari.

 

No tin muchu kambio riba e tabla di posishon di e proyekto komparashon di prèis. Warehouse ta keda esun di mas barata y Beyond minimarket, un toko di bario, esun di mas karu. Sí por nota ku e diferenshanan den prèis di e supermerkadonan poko poko ta birando mas chikí. Si den luna di ougustus 2018 e diferensha entre esun mas karu y esun mas barata tabata 40%, den luna di yüli 2019 esaki a baha te ku 27%.

 

Apesar di esei tòg ta keda eksistí diferenshanan grandi di prèis ku ta inèksplikabel. Por ehèmpel: un saku di té marka Lipton ta kosta na Rincon City 5 sèn y na Jia Xing y Zung Kong 10 sèn. Dos biaha mas karu. Papa marka Quaker na Rincon City y Liang Xiang ta kosta $ 8,00 pa kilo. Na Zung Kong y New World esaki ta 27% mas karu. Konsumidónan ku no ta preokupá pa marka di un produkto ta sali muchu mas barata. E papa di mas barata no ta kosta mas ku $ 2.00 pa kilo na van den Tweel y Warehouse.

 

Ku otro palabra, e konsumidó konsiente di prèis, por spar hopi. Ku e proyekto di komparashon di prèis aki, Unkobon y Fundashon Tienda pa Konsumidó kier konsientisá e konsumidó aki na Boneiru kon presupuestá y gasta menos pa produktonan básiko. Den e proyekto aki Unkobon y FtpKB taq traha huntu ku EZK, RCN y Sage BV.

 

Riba e website www.Unkobon.org e konsumidó por mira e resultado di e komparashon di prèis y tambe un bista total di tur e prèisnan y tambe informashon di e supermerkadonan ku ta partisipá. Riba e “spreadsheet” por mira detaye di tur e prèisnan. Tambe por mira mesora na kua supermerkado e produkto di e makutu básiko ta mas kombiniente.

Spòtlait