Komparashon di prèis novèmber 2019

Prèis den supermerkadonan a baha den 2019

Manera ya kaba konosí e prèis promedio di e pakéte di fruta y bèrdura fresku, a bira ekstremadamente karu. Esaki no ta e kaso pa 47 di e 60 produktonan básiko den e makutu di e proyekto di komparashon di prèis.

Si no tuma prèisnan di fruta y bèrdura den konsiderashon por konkluí ku den e 15 supermerkadonan, ku ta tuma parti den e proyekto di komparashon di prèis, e pakete di 47 produkto ta tin un bahada leve den 2019. Den luna di novèmber 2019 e prèis promedio di e pakete aki a baha ku mei porshentu den komparashon di yanüari 2019.

E supermerkado mas barata di Boneiru no a sigui e evolushon aki. Den luna di novèmber a resultá ku e makutu ku 47 produkto básiko a bira 6% mas karu den komparashon ku luna  di yanüari 2019. Ta di spera ku e maneho skèrpi di e supermerkado aki, pa loke ta stipulashon di prèis, no kai na awa.

Den luna di yanüari 2019 e margen di Warehouse tabata 16.5% mas abou ku esun numero 2 ku ta Wing Cheung. Den luna di november esaki a baha bira 9%..

Hopi konsumidó tin e impreshon ku van den Tweel ta e supermerkado mas karu di Boneiru. Konforme e resultado di e proyekto di komparashon di prèis, e supermerkado aki ta score konstantemente rònt di e promedio y den e ultimo dos lunanan asta mas abou. Den luna di november van den Tweel ta okupá e di sinku lugá.

Ku e proyekto di komparashon di prèis aki, Unkobon y Fundashon Tienda pa Konsumidó ta konsientisá e konsumidó aki na Boneiru kon presupuestá y gasta menos pa produktonan básiko. Den e proyekto aki Unkobon y FtpKB ta traha huntu ku EZK, RCN y Sage BV.

Riba e website www.unkobon.org e konsumidó por mira e resultado di e komparashon di preis y tambe haña un bista total di tur e prèisnan y informashon di e supermerkadonan ku ta partisipá. Riba e “spreadsheet” por mira detaye di tur e prèisnan. Tambe por mira mesora na kua supermerkado e produkto di e makutu básiko ta mas kombiniente.

Spòtlait