Mas supermerkado no ta koperá mas ku e proyekto Komparashon di Preis

Solamente 11 super-i minimerkado a tuma parti den e proyekto Komparashon di Preis. Relashoná ku esaki e proyekto komparashon di preis no ta representativo mas. Unkobon ta  deliberando ku e ministerio di EZK i ku OLB si mester kontinuá ku e proyekto aki.

E komparashon di preis, den un forma mashá transparente, ta laga e konsumidónan mira mensualmente kua super-òf minimerkado ta mas barata pa un makuto di 67 produkto básiko. Meta di e proyekto aki ta pa hasi e konsumidó mas konsiente pa loke ta trata preis di komestibel.
Supermerkadonan ku no ta partisipá na e proyekto aki ta perhudiká konsientisashon di preis di nan klientela.

Mientras tantu mayoria di e super-òf minimerkadonan a inkluí den e makutu banda di produktonan di marka-A tambe produktonan di marka privada mas barata. E kliente por skohe na e supermerkadonan aki di paga pa por ehèmpel un detergente di nòmber, mas ku $ 3,00 pa liter òf skohe pa un detergente mas barata di $ 1,60 pa liter. E produktonan mas barata ta di bon kalidat. Nan ta mas barata komo ku no ta hasi kampaña di propaganda kostoso pa nan.

Finalmente ta keda na e kliente pa skohe na kua super-òf minimerkado e kier hasi su kompranan. E supermerkadonan ku ta partisipá na e proyekto Komparashon di Preis ta hunga karta habrí ku nan klientela pa loke ta preis di e komestibelnan básiko.

Spotlait