Komparashon di prèis dezèmber 2019

Yanuari no tin  komparashon di prèis

Desde ougùstùs 2018 ta publiká un komparashon di preis tur luna. Komparashon di Preis ta un akuerdo di kolaborashon temporal entre e organisashonnan di konsumidó Unkobon i Fundashon Tienda pa Konsumidó Boneriano (FTpKB), Ministerio di Asuntunan Ekonómiko i Klima (EZK), RCN i Sage B.V. E akuerdo di kolaborashon ta terminá na dezèmber 2019.

Diessinku supermerkado ta partisipá na e Komparashon di Preis Boneiru. Tur luna e komparashon di preis ta registrá e preisnan mas barata di 60 produkto hopi kumprá na e 15 supermerkadonan aki, i ta kompará esaki pa por yega na un lista di klasifikashon. Dor di paga mas tinu riba preis, konsumidó por skapa sèn riba kompra.

Riba e wèpsait www.Unkobon.org konsumidónan por mira e lista di komparashon di preis i tambe e resumen kompleto ku e preisnan i informashon di kada supermerkado ku ta partisipá. E resumen ta un ‘spreadsheet’ amplio, kaminda por mira tur preis ku ta kalkulá den e komparashon. Por mira rápido tambe, na kua supermerkado un produkto di e makutu ta mas barata.

Evaluashon di e komparashon di preis ta mustra ku hendenan na Boneiru ta paga mas tinu awó riba preis di produkto kompará ku un aña pasá. Dos konsumidó di kada tres, ta indiká ku e komparashon di preis tabata ta tin influensha riba nan eskoho ora di hasi kompras.

E rapòrt di evaluashon ta mustra tambe, ku e komparashon di preis tin influensha riba e surtido di e supermerkadonan. Awor mas supermerkado ta duna nan klientenan un eskoho entre markanan konosí pero karu i markanan mas barata pero bon. Mas mihó un supermerkado logra esaki, mas e ta subi riba e lista di komparashon di preis.

Komo punto di mehorashon, e rapòrt di evaluashon ta menshoná entre otro mas komunikashon via radio i televishon òf via presentashonnan den bario.

Ministerio EZK i gobièrno di Boneiru (OLB) ta aktualmente den kòmbersashon pa yega na klaridat kon por apliká e komparashon di preis den e aña benidero. Esaki no ta rònt ainda. Komparashon di preis lo no sali yanüari aki.

Spòtlait