Tòp 4 di Komparashon di prèis aprel 2019 ta keda meskos

E komparashon di preis ta wak seka e supermerkadonan ku ta partisipá, solamente e artikulo mas barata di kada un di e 60 produktonan inkluí. Ta posibel ku den e mesun tiendanan aki tin tambe un variedat mas karu di kada produkto. Ademas, preis i inventario ta varia regularmente. Konsumidónan por spar sèn dor di kumpra konsiente i paga bon tinu riba preis.

Preis di produktonan fresku, manera bèrdura i fruta, ta varia mas tantu. Esaki ta normal. Den luna di aprel, e subida relativo di preis di banana i lamunchi tabata notabel. Na mart kasi niun tienda no tabata tin banana, probablemente dor di problema di importashon for di Venezuela. Hopi tienda a bolbe haña banana pa aprel, pero na un preis promedio di kasi 80 sèn dòler pa pida, lokual ta dòbel di e preis promedio na februari di e aña aki. Lamunchi tambe a bira basta mas karu. Na februari un kilo di lamunchi tabata kosta promedio $3.18, na mart e preis promedio tabata $3.45 pa kilo, i e luna aki ela subi atrobe yega un promedio di $ 4.10 pa kilo. Pues e subida di preis a konsekuensia di e serada di frontera ku Venezuela a kontinuá pa e produktonan aki.

Via e website Unkobon.org konsumidónan por baha e Komparashon di Preis i e ‘spreadsheet’ ku informashon general di tur preis di e 60 produktonan na kada supermerkado ku ta partisipá. E ‘spreadsheet’ ku informashon general ta kontené e detayenan di e preisnan inkluí den e kalkulashon, i tambe un resumen kaminda por mira na kua supermerkado e preis di kada produkto ta mas kumbiniente.

Spòtlait