Den e buletin aki: promé reunion di Bondsraad pa loke ta trata 2020, klientenan di ING Bank Hulanda, residensiá na e islanan BES, prèis di kombustibel konforme  esnan di Kòrsou, no mester paga prima, personanan di kontakto di Unkobon.

Promé reunion di Bondsraad pa loke ta trata 2020 E promé reunion general, ku pa motibu di Covid-19 a keda posponé, a tuma lugá dia 22 di yüni último den Hòfi Kultural. Den e reunion aki a keda tratá e.o.: relato finansiero, relato anual 2019 y e plannan pa 2020. Tur a keda aprobá. Tambe riba agenda ta tin nombramentu di Marianne Grutters komo miembro di direktiva di Unkobon. Marianne lo bai okupá e puesto di sekretario. Danki na e aporte di e miembronan presente, e reunion tabata uno animá y fruktifero.

Bon notisia pa klientenan di ING Bank Hulanda ku ta residensiá na e islanan BES Sentenares di habitante na e islanan BES a keda informá pa ING Bank Hulanda ku mensualmente nan lo tin bai paga 1 euro èkstra pa motibu ku nan ta biba den eksterior. Unkobon a informá  DNB (De Nederlandse Bank) di e medida aki. Konsekuentemente ING Bank a hala atras e medida aki pa e klientenan residensiá na e islanan BES mirando e status speshal di un munisipio ku BES tin i tambe pa e echo ku e islanan BES ta kai bou di pais Hulanda.

Preisnan di kombustibel For di inisio di desember 2019 Unkobon a pidi kolegio ehekutivo di Boneiru un splikashon pa e motibu di kon e preis di gasolin na Boneiru ta muchu mas haltu kompará ku esun di Kòrsou i Aruba. E persistensha di Unkobon ta tin èksito. Den luna di aprel 2020 preisnan di kombustibel a baha konsiderabelmente. Despues di e bahada di dia 1 di yüli último e preisnan ta konforme esnan na Kòrsou i Aruba.  

E accijns riba gasolin ta kasi 32 sèn pa liter. Unkobon ta tratando di konvensé Kolegio Ehekutivo di Boneiru pa pidi Hulanda pa redusí esaki temporalmente. Unkobon lo sigui lucha pa preisnan realistíko di kombustibel aki na Boneiru.

Personan di kontakto di Unkobon Unkobon ta deseá di risibí mas señal for di komunidat, mas kontakto ku e konsumidó y tambe mas kontakto ku e miembronan. Komo tal Unkobon a aserká su miembronan tokante e deseo aki. A trata di haña un persona di kontakto pa kada bario aki na Boneiru,  E resultado di e aserkamentu aki ta ku ocho persona a aseptá pa logra e meta aki.       Den e promé reunion konhuntamente a traha riba un plan pa e personanan di kontakto. E punto di akshon mas importante ta pa pasa señalnan di preokupashon ku ta biba den komunidat y ku por ta di importansha pa Unkobon. Nòmber y number di telefon di e personanan di kontakto lo wòrdu publiká riba e website di Unkobon.