Den e buletin aki: kombersashon ku sekretaria di estado Alexandra van Huffelen, Unkobon ta bai entamá un kaso hurídiko relashoná ku minimo soshal, Unkobon hopi den publisidat, temor pa oumento di gastu bankario relashoná ku “debit cards” nobo, kontribushon

Kombersashon ku sekretaria di estado Alexandra van Huffelen

Dia 14 di febrüari último direktiva di Unkobon a kombersá ku Sra. Alexandra van Huffelen, Sekretaria di Estado pa Asuntonan Interior i pa Relashonnan di Reino. Henk Brons,  Direktor General pa Relashonnan di Reino i Jan Helmond, Representante Suplente di Reino, tambe tabata presente.

A deliniá e aktividatnan di e último 10 aña ku Unkobon a realisá na interes di e poblashon di Boneiru. Seguidamente Unkobon a pidi atenshon pa e desaroyo preokupante i alarmante aki na Boneiru relashoná ku: oumento drástiko di kosto di bida, e atraso kresiente den e legislashon pa protehá e konsumidónan manera ta e kaso na Hulanda, e diskrepansia den maneho di supsidio i kontinuashon di e maneho menos eksitoso “ijkpuntenbeleid” den kual mester a yega na un forma pa redusí e gastunan pa kosto di bida drástikamente.

E Sekretario di Estado a risibí tambe informashon di e plan pa huntu ku OLB funda un fundashon di krédito unda hendenan ku un entrada abou ku kier konstruí nan propio kas, por risibi un fiansa.

Den 2022 Unkobon lo traha riba e siguiente puntonan: hasi invershon den energia duradero mas fasil, eliminá e atraso den e derechi di konsumidónan i yega na stipulashon di un minimo soshal basá riba kostonan real di kosto di bida. Na final di e kombersashon ameno, futuro presidente di Unkobon, señor Herbert Piar a entregá señora van Huffelen un tas di Unkobon.

Unkobon ta bai entamá un kaso hurídiko relashoná ku minimo soshal
Gobierno Hulandes ta garantisá su pueblo ku ta biba na Hulanda un dignidat humano ku un minimo soshal basá riba e gastu minimo di e kosto di bida. Ya pa mas ku 11 aña e mesun gobiernu ta nenga di stipulá un soshal minimo ekivalente na esun di Hulanda pa su pueblo ku ta bida na Hulanda Caribense

Despues ku pa años a hasi hopi intento pa den deliberashon ku mandatario- i ambternarnan yega na un solushon tokante e minimo soshal, Unkobon ta bai entamá awó un kaso hurídiko. Unkobon ta spera ku e akshon aki lo lanta e atenshon pa e inhustisia doloroso aki. Abogado Channa Samkalden, di e bufete  van Prakken i D’Oliveira, despues di un investigashon kuidadoso a yega na e konklushon ku e veredikto den un kaso huríko tin hopi chèns pa kai na fabor di Boneiru

Unkobon hopi den publisidat
Publisidat ta di gran importansha den e lucha pa mehorá entre otro e forsa di kompra di e konsumidónan aki na Boneiru. Dia 17 di yanüari último den un transmishon di NTR Caribisch Netwerk a dediká hopi atenshon pa e punto aki. Ni un luna despues BNN Vara di Hulanda, den e programa Zembla a dediká atenshon na e lucha di Unkobon pa mehorá e forsa di kompra pa e poblashon di Boneiru.

Temor pa oumento di gastunan bankario relashoná ku “debit cards” nobo

Den e periodo benidero lo bai sustitui e Maestro bankcards pa debit cards di Visa i Mastercard. Unkobon ta investigando señalnan ku e sustitushon benidero lo bai kondusí na oumento konsiderabel di gastu pa kada transakshon aki na Boneiru.

Segun nos a keda informá ku e sistema Maestro aktual ta kobra 0.25% ku un maximo di $ 1.50 pa kada transakshon. Ku e sistema nobo e gastunan pa e komersiantenan lo bai subi mas tantu. Konsekuentemente e preisnan pa komestibel tambe lo bai subi atrobe.

Unkobon a aserká e asoshashon di bankonan ku e pregunta ku ta berdat ku e gastunan pa kada transakshon lo bai subi di 0.25% pa 3 a 4%. Nos a risibí un kontesta evasivo. Nos ta sita: “manera a keda menshoná den nos mail anterior, kada banko tin nan propio struktura pa loke ta trata gastunan. Aktualmente nos ta bezig ku e enfoke pa terminá e punto aki. Esaki teniendo kuenta ku e gastunan di Master Card pa e regio den kual e islanan ta kai. Ku tempu kada banko individual lo informá nan kliente tokante e gastunan”

Kontribushon

Resientemente a fakturá e kontribushon pa 2022 i a manda esaki via di e-mail pa bo. Sigui sostené Unkobon pagando bo kontribushon di $ 15.00 pa aña na tempu.