Buletin yanüari 2021

 

 

 

Den e buletin aki: Eric Booi ta bai baha komo presidente di direktiva di Unkobon, estudio riba posibilidat pa spar koriente, investigashon entrega di pòst, lo no kompará preis di komestibel den yanüari.

Eric Booi ta bai baha komo presidente di direktiva di Unkobon   
Resientemente Eric Booi a informá koleganan ku entrante 7 di mart 2021 e lo retirá komo presidente di direktiva di Unkobon. Riba e fecha aki Eric lo kumpli e edat respetá di 75 aña y ta deseá di entregá e martin na un susesor.

Dia 28 di novèmber 2015 Konseho di Bònt (Bondsraad) a nombra Eric miembro di direktiva di Unkobon den e funshon di sekretario. Den un tempu relativamente kòrtiku Eric a familiarizá su mes ku e trabounan di Unkobon y ku hopi regularidat tabata funhi komo portabos di Unkobon. Dos aña despues, dia 26 di mei 2018, Konseho di Bònt a nombra Eric presidente di direktiva di Unkobon. Ku hopi fervor Eric ta representá Unkobon na radio y televishon. Internamente Eric ta un presidente mashá kolegial y ku a sa di promové e unidat den e direktiva di Unkobon. Tambe Eric tabata para firme pa no tacha e kostumbernan boneriano y pa tene kuenta ku esakinan na momentu ku ta trata puntonan na interes di e konsumidó lokal. Unkobon ta mashá agradisido pa su kontribushon balioso duná na e organisashon.

Unkobon ta respetá e desishon di Eric pa bai mas trankil den bida ounke ku un tiki reserva. Danki Dios Eric lo keda komo konsehero di Unkobo.  

Relashoná ku e retiro di Eric den luna di mart lo tin un vakatura den direktiva di Unkobon. Miembronan ku tin un sugerensha òf kier duna un aporte ta wòrdu supliká pa aserká direktiva via di whatsapp telf +599 7821009 òf via di e mail secretariaat@unkobon.org.

Estudio riba posibilidat pa spar koriente    
E organisashon informativo Milieu Centraal, riba instrukshon di e ministerio di BZK, a inisiá un estudio riba posibilidatnan pa spar koriente. Pa dirihí e estudio riba e situashonnan spesífiko di Boneiru alrededor di dia 1 di febrüari 2021 lo kuminsá ku un enkuesta “online”. A keda palabrá ku Unkobon lo sostené e estudio aki via di su página di face book. Pa logra haña un resultado konfiabel ta importante pa hopi konsumidó yena e enkuesta aki. Komo tal Unkobon ta hasi un yamada na su miembronan pa partisipá na e enkuesta aki.  

Investigashon entrega di pòst   
E ofesina di Kòrsou yamá Indigo Blue, riba instrukshon di e ministerio di asuntonan ekonómiko, a inisiá un investigashon rigoroso riba e kalidat di entrega di pòst interinsular y insular. Aki tambe Unkobon a palabrá ku lo sostené e investigashon aki via di su pagina di facebook. Den e di dos parti di febrüari 2021 lo tene un enkuesta riba e tópiko aki. Unkobon ta hasi un yamada na su miembronan pa partisipá na e enkuesta aki.    

Lo no kompará preis di komestibel den yanüari 2021     
Na inisio di e aña aki e kontagio di Covid 19 a subi drástikamente aki na Boneiru. Gezaghebber a hasi un yamada pa traha mas tantu ku ta posibel na kas. Den konsulta ku e ministerio di asuntonan ekonómiko y OLB a disidí pa no laga e trahadónan bishitá e super-i minimerkadonan pa bai kompará e preis di e komestibelnan básiko. Komo tal fin di yanüari lo no tin e resultado di komparashon di preis akustumbrá.