Buletin ougustus – oktober 2021

Den e buletin aki: di dos reunion general di Bondsraad, investigashon relashoná ku entrega di pòst, Fundashon Mini-Krédito pa konstrukshon di bo propio kas, kaso kontra di De Nederlandse Staat relashoná ku minimo soshal, Unkobon tei pa tur kònsumidó.

Di dos reunion general di Bondsraad
Tur miembro ta keda kordialmente invitá na e di dos reunion general di Bondsraad kual lo tuma lugá dia 17 di november 2021. For di 18.45 bo ta mas ku bon biní na Hòfi Kultural, Antriol. Un siman promé ku e reunion, miembronan lo bolbe risibí un invitashon i e puntonan di agenda.
Investigashon relashoná ku entrega di pòst
Riba instrukshon di ministerio pa Asuntonan Ekonómiko, Indigo Blue, un ofisina di Kòrsou, a hasi un investigashon berdadero tokante e kalidat di entrega di pòst lokalmente. Un ke otro despues ku Unkobon a buta preshon i pregunta den parlemento Holandes en torno entrega di pòst. E rapòrt di e ofisina investigativo a wòrdu mandá pa Tweede Kamer. Awó a sali na kla ken ta esnan responsabel pa e problemanan en torno entregamentu di pòst. Trabou tin awó pa e ministerionan di EZK, BZK, i I & W, pa Post NL, OLB i tambe FXDC Fundashon

Mini-Krédito pa konstrukshon di bo propio kas
Te ku 2010 hendenan ku kier a konstruí nan propio kas i ku no tabata bin na remarke pa un fiansa na un banko komersial, por a akudí na Fundashon pa Krédito Boneriano pa un krédito. Di e forma aki mas ku mil hende por a risibí un krédito pa terminá nan kas. Despues di e kambio estatal FKB no a otorgá fiansa mas.
Michiel Bijkerk, miembro di Unkobon, a pidi atenshon pa esaki. E komishon pa asuntunan finansiero di Unkobon huntu ku Sr. Bijkerk a traha riba e idea aki. E skètch di Fundashon Mini Krédito Boneiru a keda presentá na Kolegio Ehekutivo. E diputadonan a mustra interes pa e proyekto. Den kolaborashon ku OLB lo prosesá e plan.

Akshon minimo soshal
Ya for di 2012 tabata konosí ku e problema di pobresa den Hulanda Karibense a bira mas grandi. Tambe danki na Unkobon, regularmente ta tin atenshon den parlamento di Hulanda pa e problemátiko aki. E Ombudsman pa asuntonan nashonal i e Komishon pa derechinan humano tambe a dediká hopi tempu na esaki. Apesar di esaki ainda no tin un solushon na bista pa e problema di pobresa na e islanan BES.
E medidanan ku gobiernu a anunsiá ku hopi fanfamia no a minimalisá e problema. Kasi 40% di e poblashon di Boneiru ta bibando bou di e minimo soshal. Hulanda por laba su man komo ku ainda no a stipulá formalmente un minimo soshal pa e tres islanan.
Konseho Insular tambe a lanta foi soño i a aseptá un moshon ku mester hasi un yamada na e politikonan hulandes pa perkurá pa stipulá un minimo soshal pa e islanan BES basá riba kosto di bida real.

Teniendo kuenta ku e desaroyo politiko na Hulanda, ta fèrwágt ku e mesun partidonan politiko ku e ultimo añanan tabata na poder lo bai forma e gobiernu nobo, Unkobon no ta spera ningun resultado positivo pa ku e stipulashon di e minimo soshal. Komo tal Unkobon ta konsiderando pa inisiá un kaso na Hulanda kontra “De Staat der Nederlanden. Aktualmente un komishon ta trahando riba e kaso. A aserká un bankete di abogado renombrá na Hulanda pa studia e posibilidatnan. Un eventual proseso ta kosta hopi plaka i lo tin bai wòrdu finansiá externamente. E komishon ta studiando e posibilidat kon yega na e fondo nesesario. Apesar ku e komishon tin algun idea kaba den mente lo ta bon si e miembronan tambe yuda pensa riba e posibildatnan pa yega na e fondo nesesario. Huntu nos por mas. Den e simannan benidero miembronan lo risibi mas informashon di e komishon tokante e akshon aki.

Unkobon tei pa tur konsumidó aki na Boneiru
Resientemente presidente di Fundashon Tienda pa Konsumidó Boneiru, señora J. Daflaar, a hasi algun ekspreshon inkorekto i negativo riba Unkobon den Konseho Insular i den un programa radial . Unkobon a reakshoná ku un relato di prensa den kual a duna informashon objektivo di henter e asuntu. Señora Daflaar a diskulpá su mes serka ex-presidente di Unkobon, señor Eric Booi.