Buletin novèmber – desèmber 2021

Den e buletin aki: di dos reunion general di Bondsraad, introdukshon di Herbert Piar, Zembla bishitá Unkobon, promoshon gratis na Mega FM, deseo pa fin di aña

Di dos reunion general di Bondsraad
Dia 17 di novèmber 2021, den e di dos reunion general di Bondsraad yen di bida, Herbert Piar a keda nombrá komo miembro di direktiva di Unkobon. Bondsraad a aprobá e nota di strategia pa 2022 -2024 (Hulandes so). Puntonan di lansa di Unkobon pa e próksimo tres añanan ta: minimo soshal, kondishonnan general/areglo di disputa i produktonan básiko pagabel. E puntonan di lansa aki lo bai haña èkstra atenshon e añanan benidero. E estimashon di mas aña pa e periodo di 2022 -2024(Hulandes so) tambe a keda aprobá.
Tres miembro a forma un komishon pa investigá e posibilidat pa un marshe sentral. unda tur e marshenan aktual lo por uni na un sitio sentral i fasil pa yega.
E reunion tabata hopi animá i bon bishitá. Despues di e reunion, manera ya a bira kostumber, ta tin un agasaho ameno.

Laga nos presentá señor Herbert Piar na bosobr />Herbert a lanta na Rincon. E ta tin 11 ruman di kual e tabata number sinku. Despues di skol básiko, e a bai M.U.L.O na playa. Awendia Mulo a bira Mavo. Manera hopi di su generashon, e mester a bai Kòrsou ku su di 16 aña pa kontinuá ayanan ku su estudio na HBS. Awe HAVO/VWO.
Herbert su preferensha tabata pa tèknologia. Komo tal e a bai Hulanda i terminá ayanan su estudio na HTS. Djeinan e a bai traha na un Ingenieursbureau. Despues di un aña e a wòrdu mandá Aruba pa bai traha na FCCA, (Fundashon Cas pa Comunidad Arubano). Un ke otro den kuadro di e koperashon pa desaroyo. Den mesun periodo ei FCB (Fundashon Cas Boneriano) a inisiá ku e proyekto pa kasnan di pueblo na Amboina ku asistensha di un tèkniko for di Hulanda. Despues di un aña e tèkniko a regresá Hulanda i Herbert a keda aserká pa kontinuá ku e proyekto na Boneiru. Finalmente Herbert a traha 22 aña na FCB. E promé añanan komo projekt manager despues komo direktor di FCB.
Na 2007 Herbert a kuminsá ku su propio ofesina di konsulta. Aktualmente e ofesina ta wòrdu manehá pa su yu mayó.
Na Boneiru Herbert a kasa ku Ruthmilda. Su 4 yunan tur ta adulto.
Siendo un persona aktivo den komunidat, Herbert a i ta ehersé diferente funshon den direktiva di e.o. Sede Boneriano, Sofna, SGB, SGB, Stinapa, Cocari. Riba tereno deportivo tambe Herbert tabata duna su aporte komo boluntario. Komo ku e tabata sobra tiki tempu pa su mes, su kasá a haña ku ta di mas. Pa e motibu ei Herbert mester a konsultá ku su kasá promé ku e a disidí pa bai duna su aporte na Unkobon.
Komo miembro di direktiva di Unkobon Herbert kier duna atrobe un aporte grandi na e desaroyonan soshal aki na Boneiru.

Zembla bishitá Unkobon
Dia 16 di desèmber último Unkobon a risibí bishita di e produktornan di e programa Zembla pa un entrevista ekstenso tokante e pobresa kresiente aki na Boneiru. Dia 17 di febrüari 2022 lo transmití e dokumentashon aki den e programa di Zembla via di e kanalnan di televishon na Hulanda. Di e forma aki e akshon di Unkobon pa yega na un minimo soshal basá riba kosto di bida real, lo alkansá hopi hende na Hulanda tambe.

Promoshon gratis na radio Mega FM
Probablemente ya bo lo a skucha e promoshon via di e stashon di radio Mega FM. E promoshon aki ta kompletamente gratis. E propietario, Ron Gijzen, ta di opinion ku Unkobon ta hasiendo bon trabou pa e komunidat boneriano i ta sostoné tur e aktividatnan di Unkobon hasiendo promoshon pa esakinan kompletamente gratis.

Deseo pa fin di aña

Felis dianan di fiesta i un próspero 2022 yená ku dicha, felisidat i positivismo.