Den e buletin aki: kòmbèrsashon grupo di trabou karetera di Boneiru ku diputado Kroon, kòmbèrsashon direktiva ku presidente di komishon di hür, promé reunion general, deraroyo di e kaso hudisial en konekshon ku minimo soshal, mini-krédito pa konstrukshon di bo propio kas, kontribushon, Unkobon 10 aña.

Werkgroep wegen
Manera tur hende por a nota ku den e di dos parti di 2021 a kuminsá ku mehorashon di kayanan di Boneiru. Sinembargo e Grupo di trabou di Unkobon pa loke ta trata kayanan di Boneiru, ta nota ku mester di muchu mas den reahustashon di e planifikashon ku a keda publiká den 2021.
Medio yüni 2022 e grupo di trabou a kòmbèrsá ku diputado Kroon i e project manager Joselito Statia tokante esaki. Sr. Statia ta informá ku 70% di e planifikashon a keda realisá i ku a kuminsá traha na e otro 30% di e kayanan planifiká. A duna prioridat pa buta e promé kapa di asfalt riba e kayanan mas peligroso i esaki a duna resultado visibel. Unkobon a felisitá Srs Kroon i Statia ku e logro aki.

Lo mehorá e komunikashon di OLB ku poblashon di Boneiru. Den e planifikashon pa e aña aki tin pa wòrdu ehekutá: lugá di stashoná outo unda antes e prison tabata, despues un “zona blou” den sentro di siudat, Bulevar Gob.N.Debrot lo bai haña e promé kapa di asfalt igual ku e kaminda pa Rincon. Pa un término mas largu kaminda pa baiskel na banda di e kayanan prinsipal i lo bai evaluá e situashon di tráfiko pa yega na un red di kaminda mas duradero pa futuro.
Tambe a hasi menshon ku kayanan den barionan residenshal lo wòrdu disponé di klenku I kayanan di akseso lo wòrdu asfaltá. Pa e situashon di lodo dilanti di “brede school” lo bai aserká e ministerio pa un solushon.

Unkobon ta kier a saka un komunikado di prensa riba e tópiko aki, Pa verifiká e echonan e grupo di trabou a manda e planifikashon pa e project manager ku e petihon pa indiká den e ultimo kolom e situashon aktual. Te ku fecha di awe no a risibí un reakshon apesar di un rekordatorio via e mail.

Kòmbèrsashon ku komishon di hür
Medio luna di yüni último direktiva di Unkobon a sera konosí ku señora Eveline Jacquemijns, presidente di komishon di hür di Boneiru. Sr. Herbert Piar, entrante presidente di Unkobon, a duna Sra Jacquemijns algun informashon tokante konstrukshon di kas durante su periodo na Fundashon Kas Boneriano. Sra. Jacquemijns ta informá ku hürdónan ta aserká komishon di hür ku menos frekuensia kompará ku esnan ku ta vèrhür e kas. Mas informashon den bario por yuda den esaki. Tambe a toka e punto kon prevení problema entre hürdó i esun ku ta vèrhür. Unkobon ta dispuesto pa koperá na e dianan di informashon aki. Sr. Charlon Carlo, sekretario di komishon di hür lo tuma e inisiativa ku esaki.

Promé reunion general
Dia promé di yüni último ta tin e promé reunion general ku a tuma lugá den Hòfi Kultural.
Sra. Lydia Duyn pa promé biaha a forma parti di e reunion komo miembro di Bondsraad.
Sr. Andy Lepelaars a keda nombrá komo miembro di direktiva di Unkobon den e funshon di tesorero.
E relato di evaluashon di aña 2021 i e plan anual pa 2022 a keda komprobá. E relato anual di 2021 sinembargo pa motibunan imprevisto no a keda kla. A keda disidí ku lo trata esaki den e di dos reunion general.
Manera ya a bira un tradishon despues di reunion, miembronan a keda un ratu huntu pa kombèrsá informal ku e miembronan di direktiva i tambe pa goza di e bar bon sortí.

Voortgang rechtszaak sociaal minimumYa pa años Unkobon ta intentando envano pa logra konvensé polítiko i gobièrnonan di turno pa hasi algu sustansial kontra e pobresa na Boneiru. Finalmente a keda disidí pa via di un kaso hudisial forsa estado Hulandes pa garantisá e poblashon di Boneiru i tamba Saba i Statia un eksistensia digno ku ta ekivalente na esun di Hulanda. Un grupo di trabou di Unkobon ta enkargá ku esaki.

Despues ku Unkobon a hasi un yamada via di prensa pa haña mas koperashon pa su lucha, ta tin un kombersashon ku un delegashon di e Diálogo Sentral kuminsamentu di yüli. Un reunion frutíforo unda diferente malentendimentu a keda eliminá.
Miembronan di e Diálogo Sentral tambe kier pa Estado Hulandes tuma e lucha kontra pobresa na serio. A keda palabrá ku lo tene otro na altura di e desaroyonan.
Pa e proyekto aki Unkobon no solamente a buska un abogado pero tambe un kampañadó/lòbiista ku na Hulanda ta perkurá pa hopi publisidat. Kuminsamentu di yüni Unkobon a dirihí un karta na e komishon di relashonnan di reino i e kampañadó a perkurá pa a entregá un moshon unda e gabinete ta wòrdu invoká pa den aña 2023 fiha un minimo soshal basá riba gastunan real. E moshon a wòrdu deskonsehá i despues rechasá pa partidanan ku den 2016 a aprobá un moshon ekivalente na esaki, pero sin limite di tempu.
E kampañadó a perkurá tambe ku e karta ku abogado di Unkobon a manda pa e minister di pobresa, a haña hopi publisidat na Hulanda. Un reportahe ekstenso den NRC, , un artikulo den De Kanttekening, (un korant digital), un kolomna den Volkskrant i hasta atenshon den e notisiero radial di NPO 1. Prensa lokal tambe a dediká hopi atenshon na e kaso aki.
Riba e web site di Unkobon a produsí un página apart pa e proyekto aki. Tambe riba Facebook Unkobon ta publiká ku regularidat desaroyo di e kaso aki.

E kaso hudisial aki su posibilidat pa ta un eksito ta dependé di un enfoke profeshonal, i esaki ta kosta plaka. Komo tal e grupo di trabou a bin ku un akshon pa rekoudá $ 150.000,00 mas lihé posibel. Den e promé instante a aserká e relashonnan ku sufisiente medio finansiero pa kontribuí en grande na e kaso noble aki i tambe pa hustisia pa e poblashon. E akshon aki ta tin eksito. Ku yudansa di mas donante por anunsiá ku despues di dos luna a rekoudá mas ku mitar di e suma nesesario.

Miembro ku ta deseá di hasi un donashon por hasi esaki transferiendo e montante riba kuenta nr.400356702 na nomber di Union di Konsumido Boneiru, Kaya Korona 30, Bonaire na MCB Bonaire menshonando nan e mail adres i “rechtszaak”. Ojo: esaki ta un kuenta speshal pa e akshon pa rekoudá fondo.

Mini krédito pa konstrukshon di bo propio kas
Ya for di den luna di ougustus 2021 diputadonan tabata faboresé e idea pa forma un komishon konhuntu di OLB – Unkobon pa studia e posibilidat pa ekstendé krédito na personanan ku un entrada abou di moda ku nan por konstruí nan propio kas.
E promé reunion di e komishon aki a tuma lugá inisio di 2022. A keda palabrá ku e komishon lo hiba un kombersashon ku AFM (Autoriteit Financiële Markten). Despues e komishon lo duna un konseho na Kolegio Ehekutivo relashoná ku buskamentu di fondo pa e proyekto aki. Despues di e komienso prometedó aki a reina un silensio. Unkobon no a logra haña reakshon di e miembronan ku OLB a nombra den e komishon.

Kontribushon
Den luna di febrüari 2022 miembronan a risibí e faktura di kontribushon. Un parti grandi di miembresia no a duna oido na e petishon pa paga nan kontribushon. Lástimamente esaki no ta algo inusual, hende sa lubidá lihé. Komo ku a tuma tempu pa a haña un tesorero nobo, e rekordatorio a keda mandá den luna di yúni numa. Lástimamente un kantidat di miembro ku si a paga nan kontribushon a risibí eroneamente un rekordatorio. Direktiva ta diskulpá pa e eror aki.

10 aña Unkobon
Den luna di novèmber próksimo Unkobon ta bai kumpli 10 aña di eksistensia. Nos kier selebrá e echo aki. Direktiva ta pidi tur miembro pa bin ku un òf mas sugerensha kon selebrá e di dos lustro aki na un manera apropiá
Manda bo sugerensha na secretariaat@unkobon.org