Buletin mei – yüli 2021

Den e buletin aki: Promé reunion general di Bondsraad, medida di preis pa supermerkadonan, akshon en torno minimo soshal, movementu den e plan pa drecha kayanan, akshon di Unkobon relashoná ku pasashi aereo.

Promé reunion general di Bondsraad
Despues di a posponé e promé reunion general pa motibu di Covid 19, dia 7 di yüni último esaki a tuma lugá. Den e reunion aki a keda aprobá:
• Presidente temporal di direktiva di Unkobon: Wietze Koopman
• Presidente di Bondsraad di Unkobon: Quintin Knuf
Nota di evaluashon 2020
Relato anual 2020
Plan anual 2021
Despues di e reunion esnan presente a pasa un ratu plasentero den Hòfi Kultural.

Medida di preis pa supermerkadonan
Ya pa basta tempu Unkobon ta deliberando ku OLB i tambe ku e Ministerio di asuntonan ekonómiko i klima tokante e posibilidatnan ku e “Prijzenwet BES” ta ofresé pa mantené e preis di e makutu básiko di Boneiru, pagábel. Funshonarionan di R & O ta pará tras di e idea aki i diputado Thielman en prinsipio a bai di akuerdo ku né. Aktualmente Unkobon huntu ku e ambtenarnan lokal ta trahando riba formalisashon di e medida di preis pa e produktonan di e makutu básiko.

Akshon: minimo soshal
Den 2018 a kalkulá kiko ta e gastonan minimal pa luna pa kubri kostonan di bida. Te ainda, 2021, un kas habitá pa un persona ku un sueldo minimo di $ 950.00 tin un defisit di $ 457.00. Un kas habitá pa dos persona ku dos yu i ku un entrada di $ 950,00 pa luna tin un defisit di $ 1992.00. Esaki ta pió ku den 2017. Pa mitar di e konsumidónan aki na Boneiru e forsa di kompra ta un problema ku ta ripití su mes tur luna.
Kuminsamentu di mart 2021 Unkobon a hasi un yamada na tur esnan konserní aki na Boneiru pa tuma akshon pa stipulá un minimo soshal realistiko pa Boneiru. Na e Komishon Fiho pa relashonnan di Reino tambe a bai un karta dia 19 di aprel 2021 ku mesun petishon. Den un karta pa formadó Henriette Hamer Unkobon a suplik’é pa hinka e stipulashon di un minimo soshal pa Boneiru den e akuerdo di gobernashon.
Den 1e i 2e Kamer na Hulanda regularmente tin atenshon pa e problema di pobresa aki na Boneiru. Ta parse ku nos polítikonan aki na Boneiru a lanta foi soño debí na akshon di Unkobon riba e punto aki.

Akshon: Kayanan di Boneiru
For di diferente kombersashon hibá ku diputado Kroon i tambe ku e “projektleider kaya”, Unkobon a konkluí ku Boneiru su so no por efektuá renobáshon di tur e kayanan. Un proyekto ku ta ser kalkulá na 250 mion dollar. Den un komunikado pa prensa fechá 4 di yüli último ku Unkobon a publiká relashoná ku resiente fayonan i publikashon tendensioso di parti di gobiernu lokal, Unkobon un biaha mas publikamente a duna di konosé pa mihó transferí e responsabilidat pa renobashon di kayanan di Boneiru pa Hulanda, unda tin e konosementu pa subastá e proyekto magno aki na nivel internashonal.
Mientras tantu mas i mas hende aki na Boneiru, inkluyendo e diputadonan, ta konvensí ku na Boneiru nos so no por tur kos. E prinsipio tei. Awó falta pa konvensé e ministerio di infrastruktura i waterstaat di esaki.

Akshon: pasashi aereo

flight-og

flight-og

Relashoná ku e pandemia Covid-19 hopi buelo a keda anulá pa e kompanianan aereo. Komo ku e kompanianan aki no a duna e servisio di transporte pa kual a wòrdu pagá adelantá, e kliente mester ta tin e eskoho di haña su sèn bèk òf un voucher pa un otro buelo. E eskoho aki tambe mester a konta pa e klientenan ku a kumpra e asina yamá “non-refundable ticket”. Den e kaso aki EZ Air redondamente a nenga di duna e kliente su sèn bèk. E kompania aki no a reakshoná riba e argumentonan ku Unkobon a trese dilanti den diferente “e-mails”. Komo tal Unkobon a inisiá un akshon den kual tur esnan perhudiká por a denunsiá esaki na Unkobon. EZ Air a reakshoná ku un relato di prensa, despues Unkobon a publiká un relato mas.

Mas ku mitar di esnan perhudiká ku a raportá esaki na Unkobon a kumpra ticket na EZ Air. Tambe a drenta hopi keho riba Aruba Airlines.
Relashoná ku e publisidat negativo EZ Air a aserká su abogado.Den un interkambio di karta Unkobon a motivá su punto di bista ku un kliente tin derechi di risibí su restitushon kompletu. Unkobon a ofresé tambe pa bin huntu pa asina yega na un solushon pa e biaheronan perhudiká. E kombersashon aki no a tuma lugá ainda.