Buletin mei 2020

Den e buletin aki: konsekuensianan di Covid-19, kontribushon, planifikashon di kareteranan, desishon paro di preis, preis di kombustibel, promé reunion general.

Konsekuensianan di Covid-19
Relashoná ku e krisis ku e virus di Corona a trese kuné, aktividatnan sosial y ekonómiko, den mayoria sektor aki na Boneiru, a para ketu. Hopi konsumidó y kompania a haña nan mes den un situashon di sobrevivensia. Gobièrnu tabata hopi okupá ku medidanan di urgensia pa asina interseptá e konsekuensianan mas grave ku e krisis a trese ku n’é. Konsientemente Unkobon a minimalisá su aktividatnan pa asina duna tantu gobièrnu komo kompanianan oportunidat pa enfrentá e krisis. Unkobon a posponé e promé reunion di Bondsraad y durante di dos luna no a publiká e buletin akustumbrá. Afortunadamente a inisiá suavisá, ku e koutela nesesario, e medidanan. Direktiva di Unkobon tambe a re-anudá su aktividatnan ku menos reserva. Loke tabata kushi riba un kandela abou den e periodo tras di lomba, bo lo por lesa den e buletin aki.

Kontribushon
Den luna di yanüari 2020 tesorero Sr Moolenburgh a manda pa tur miembro e faktura di kontribushon pa loke ta trata 2020.Esaki a sosodé via “e-mail”. Den luna di mart 2020 a manda un rekòrdatorio pa esnan ku ainda no a paga. Direktiva di Unkobon ta hasi un yamada urgente na tur miembro pa kontrolá si nan kontribushon ta pagá. Den kaso esaki no ta e kaso pa transferí e kontribushon riba kuenta #406.104.07 di Unkobon na MCBBonaire menshonando bo number di miembresia òf e number riba e faktura. Tan ten ku e pakus Something Special ta será, esnan ku ta deseá di paga kèsh, por hasi esaki serka un miembro di direktiva.

Planifikashon di kareteranan
Den luna di febrüari 2020 Unkobon a pidi Kolegio Ehekutivo y tambe Konseho Insular pa den un término kòrtiku informá e poblashon di Boneiru tokante kontenido di e plan di 4 aña ku a inisiá prinsipio di 2020. Manera fèrwagt e informashon aki no a wòrdu duná integralmente. Komo e krisis di Corona a eksihí hopi tempu y energia di OLB, Unkobon a mustra komprenshon y no a rapelá e petishon. Miembronan di Unkobon ku ta deseá por tuma nota aki di e plan di 4 aña .

Desishon paro di preis
Dia 20 di mart último Kolegio Ehekutivo, pa medio di un medida di urgensia, a stipulá preis máksimo pa 71 produkto. Speshalmente riba produktonan básiko y produktonan di limpiesa. E preisnan máksimo sinembargo no a wòrdu publiká y no ta konosí tampoko kon OLB ta apliká e medida aki. E konsumidó ku rason ta puntra su mes kon e por mira si e supermerkado ta tene su mes na e preis máksimo menshoná den e dekreto di OLB. Den un relato pa prensa Unkobon ta pidi OLB pa publiká e preisnan máksimo y tambe ku esaki ta konta pa tur supermerkado aki na Boneiru.

Prèis di kombustibel (gasolin, diesel etc.)
Dia 11 di desember 2019, Unkobon, hasiendo uso di e lei WOB, a pidi Kolegio Ehekutivo di Boneiru pa duna un splikashon en torno e prèis ekstremadamente haltu di gasolin aki na Boneiru. Fin di febrüari 2020 durante un reunion konfidenshal, Unkobon a haña un bista kon ta yega na e preis di kombustibel aki na Boneiru. Pero ketu bai no a keda kla dikon ya pa 6 luna e preisnan kompará ku Kòrsou tabata diferenshá tantu asina. E informashonan primintí tokante esaki no a wòrdu duná. Komo tal dia 24 di mart último Unkobon a hasi un yamada na Kolegio Ehekutivo via di prensa y medianan soshal, pa entrante 1 di aprel 2020 redusí e preisnan di kombustibel konsiderabelmente. Relashoná ku e yamada aki diputado Elvis Tjin A Sjoe a invitá direktiva di Unkobon. Den e reunion aki direktiva a aklará un ke otro. Resultado: Entrante 3 di aprel 2020 preis di gasolin y diesel a baha konsiderabelmente
Ounke ku den luna di mei ta tin espasio pa sigui redusí e preis di kombustibel, Kolegio Ehekutivo no a hasi uzo di e oportunidat aki.. Unkobon lo sigui lucha pa preisnan realistíko di kombustibel aki na Boneiru. Tumando na kuenta ku petroleo a baha drástikamente, redukshon di preis pa gasolin y diesel entrante 1 di yüni 2020 ta mas ku hustu.

 

Reunion di Bondsraad
E promé reunion general, ku pa motibu di Covid-19 a keda posponé, lo tuma lugá awó dia 22 di yüni 2020 na Hòfi Kultural pa 19.00. Kuminsá reservá e fecha aki.