Buletin mart – aprel 2022

Den e buletin aki: preis hürmentu di kas oumentando, kondishonnan general di WEB, kombersashon ku delegashon di ministerio pa Asuntonan Ekonómiko, komishon “kayanan di Boneiru” a dirihí karta na diputado Kroon, maneho di prèis relashoná ku preisnan di primera nesesidat, reunion di miembro.

Solamente un parti di loke Unkobon ta hasi ta bin den publisidat. Trai kòrtina ta logrando muchu mas. Den e buletin ekstenso aki bo por tuma nota di esaki.

Preis pa hürmentu di kas oumentando
Preis pa hür un kas ta subiendo drástikamente. Mester bin un paro den esaki. Riba e website https://www.huurcommissiebonaire.com/pap/  tin un sistema kon kalkulá e prèis máksimo di hür di bo kas. Si e resultado ta bou di $750,00 pa luna i bo ta pagando mas ku esaki, “huurcommissie” por redusí esaki.

For di 1 aprel 2021 e lei nobo pa protekshon di hür na Boneiru ta na vigor. Despues di un tardanza na e ministerio di BZK e ‘huurcommissie” di Boneiru a inisiá nan trabou den luna di desember 2021. “Huurcommissie” a informá Unkobon ku diariamente nan ta risibí 10 pa 20 yamada telefóniko, whatsapp òf e-mail ku diferente tipo di pregunta i keho di siudadano ku tin problema ku hürdó pero tambe  di problema ku hürdó tin ku esun ku ta hür. E sekretario di e komishon ta trata di intermediá promé ku e problema eskalá. Den hopi okashon e partidanan no ta deseá intermediashon. Nan kier pa “huurcommissie” tene un oudiensia i yega na un desishon. For di 23 di desember a tene 5 oudiensia promedio pa luna.

Kondishonnan General di WEB
E kondishonnan general di WEB ta sumamente desfaborabel pa e konsumidó. For di 2016 Unkobon ta luchando pa un kambio den e kondishonnan aki. E kambionan fundamental tabata eksihí hopi pasenshi i perseveransia di parti di Unkobon. Aktualmente tin un konsepto kla den kual WEB a prosesá kasi tur e deseonan di Unkobon. Den luna di mei próksimo WEB, i Unkobon lo reuní. Den e reunion aki ACM (Autoriteit Consument & Markt) tambe lo duna su aportashon. Unkobon ta spera ku e vershon definitivo lo no tarda pa wòrdu publiká.

Kombersashon ku un delegashon di e ministerio pa Asuntonan Ekonómiko
Gobiernu di Hulanda kier hasi e regulashon pa e islanan BES ekivalente ku esun di Hulanda.

Dia 4 di aprel último Unkobon ta tin un reunion fruktífero ku dos funshonario di e ministerio pa Asuntonan Ekonómiko. A keda palabrá ku nan lo bai tuma e inisiativa pa lanta un “project bureau” ku lo mester bai solushoná e opstákulonan relashoná ku entrega di pòst aki na Boneiru. E siguiente puntonan tambe tabata tópiko di e kombersashon: igualisá protekshson di konsumidonan di Boneiru ku esun di Hulanda, mantené e mesun number ora kambia di “telecom-provider”, periodo balides limitá di karchinan di telefon “pre-paid”, obligá partisipashon di e sektornan di telecom i energia den e komishon di disputa, falta di un bentana hurídiko na alkanse di un i tur, falta di reglamentu di supsidio riba kompra di panel solar i outo elektróniko manera esaki ta pa e habitantenan di Hulanda.

Komishon kayanan di Boneiru
Insentivá pa e publisidat di Unkobon relashoná ku kondishon deplorabel di kayanan aki na Boneiru, trabou pa renobá i drecha e kayanan en kestion a kuminsá formalmente den e di dos parti di 2021. Pero ainda nos ta leu di yega. Si e trabounan kontinuá na e tèmpo aktual, Unkobon ta premirá ku lo dura desenas di aña promé ku e kayanan asfaltá keda renobá. Seguridat den tráfiko durante e añanan ei lo ta na peliger. Pa e motibu ei Unkobon a dirihjí un karta na diputado Kroon ku e petishon pa reanudá e koperashon ku Unkobon mas lihé posibel. Unkobon no solamente kier papia tokante e planiashon pa futuru sino tambe tokante e durabilidat di e ret di kareteranan.

Maneho di prèis
Prèis di komestibel den supermerkadonan ta subiendo drástikamente. Aña pasá Unkobon a inisia delibershon ku OLB tokante medida pa yega na un makutu ku produktonan básiko pagabel. A dura un tiki pero awó tin riba mesa un método i un plan di akshon pa stipulá prèisnan máksimo pa e makutu básiko kual ta alkansabel pa e supermerkadonan. Pa evitá, manera a pasa na 2014, ku algun produkto básiko no ta optenibel mas na Boneiru, a skohe pa traha riba e base di sosten. A fula tera ku algun supermerkado. E resultado tabata positivo. Pronto lo deliberá ku e otro supermerkadonan.

Unkobon ta haña ku e proseso ta durando demasiado largu. Pero pa e proseso aki tambe Unkobon mester di pasenshi i perseveransia.

Reunion di Bondsraad
Bo ta deseá di  asistí na e promé reunion di Bondraad pa loke ta trata 2022? Reservá e fecha 1 di yüni 2022. Ora: 18.45. Lugá: Hòfi Kultural, Kaya Skandelchi, Antriol.