Den e buletin aki: Promé reunion anual di Konseho di Bònt osponé te 7 di yuni 2021, Proyekto komparahon di preis, akshon di Unkobon relashoná ku minimo sosial, akshon di Unkobon relashoná ku kayanan na Boneiru, ultimo rekordatorio en torno kontribuhon

Promé reunion anual di Konseho di Bònt
E promé reunion anual di Konseho di Bònt di Unkobon ku mester a tuma lugá dia 29 di mart ultimo a keda posponé te 7 di yuni 2021 en konekshon ku medidanan relashoná ku Covid-19. Tur miembro di Unkobon ta kordialmente invitá pa ta presente dia 7 di yuni na Hòfi Kultural di 19.00 – 20.30 pa asistí na e reunion aki. For di 18.45 bo ta bon biní. Puntonan di agenda lo ta: relato anual 2020, plannan pa 2021. Bayendo riba e “link” aki bo lo haña e dokumentonan konserní.

Proyekto komparashon di preis
Den un relato di prensa Unkobon a anunsiá ku lo no kontinuá mas ku e proyekto di komparahon di preis. Den lunanan ku a transkurí mas i mas super-i minimerkado no tabata dispuesto mas pa partisipá boluntariamente den e proyekto aki. Unkobon ta dialogando ku OLB y tambe ku e ministerio pa asuntonan ekonómiko i klima tokante e posibilidat ku e “prijzenwet BES” ta brinda pa mantené e makutu básiko di Boneiru pagabel.

Akson relashoná ku minimo sosial
Prinsipio di mart 2021 Unkobon a hasi un yamada urgente pa stipulá un minimo sosial realistiko pa Boneiru. Mitar di e konsumidónan aki na Boneiru no tin sufisiente forsa di kompra. Un problema ku ta ripití su mes mensualmente.
Den 2018 a kalkulá kuantu e gastunan minimal pa luna ta pa kostonan di bida. Pa motibu di oumento di preis, kasnan di famia lo mester tin den 2021 un entrada di entre $ 1.407 i $ 3.112. Kasnan di famia ku un salario minimo di $ 950 ketu bai falta montantenan di entre $ 457 (un persona) i $ 1.992 (kasnan di famia ku 2 yu) pa kubri nan kosto di bida. Esaki no ta muchu mas mihó / ta pió ku den 2017. Den e aña ei e kasnan di famia tabata falta respektivamente $ 483 i $ 1.957 pa por a kubri nan kosto di bida
Tumando na kuenta ku e komishon fiho pa relashonnan di reino lo bai kombersá den luna di mei ku e ministernan konserní tokante e maneho kon kombatí pobresa i e minimo sosial, Unkobon a dirihí dia 19 di aprel ultimo un karta na e komishon aki. E karta i e aneksonan por wòrdu lesa aki (Hulandes)

Akshon relashoná ku kayanan na Boneiru
E emisora NTR, Caribish Netwerk, a dediká un notisia na esaki. For di kombersashonnan ku e lider di e proyekto “kayanan di Boneiru” Unkobon a konkluí ku por lo pronto no por spera e adelanto tan deseá relashoná ku renovashon di e kayanan aki na Boneiru. Mester bin atrobe ku un plan di mas aña, despues mester bai pidi finansiamentu i si OLB logra trese Boneiru mas eksperto pa e tempu ei, e ora ei numa podisé por bin un adelanto real. Den un relato di prensa Unkobon a konkluí ku Boneiru ta muchu chikí pa ehekutá un proyekto di $ 250 miyon. Pa evitá mas desapunto ta muchu mas mihó pa traspasá e responsabilidat pa renobashon di e kayanan pa Hulanda ku tin e konosementu pa ofresé e proyekto aki internashonalmente. Den luna di mart 2021. Unkobon a pidi e komishon pa relashonnan di reino den Tweede Kamer pa duna e problemátiko aki e atenshon nesesario. Por lesa e relato di prensa aki.

Ultimo rekordatorio en torno kontribushon

Fin di februari tesorero di Unkobon a manda un faktura relashoná ku kontribushon pa 2021 pa tur miembro. Dia 19 di mart e miembronan ku no a paga ainda a risibí un rekordatorio. Miembronan ku a paga nan kontribushon anual ($15,00) ta sostené Unkobon ku nan kontribushon. Unkobon ta gradisí e miembronan pa e rekonosementu duná na e boluntarionan di Unkobon pa nan esfuerso na interes di e konsumidónan aki na Boneiru.
Otro siman e miembronan ku no a reakshoná riba e di dos rekordatorio, lo bai risibí un ultimo rekordatorio. Direktiva ta hasi un yamada urgente na e grupo grandi ku ta bai risibí e rekordatorio aki via di e-mail pa paga e kontribushon.