Den e buletin aki: Promé reunion anual di Konseho di Bònt, Eric Booi ta konta di su eksperensia komo miembro di direktiva di Unkobon, Unkobon a bolbe habri e kaso “kayanan di Boneiru”

Promé reunion anual di Konseho di Bònt riba djaluna 29 di mart 2021
Tur miembro di Unkobon ta keda kordialmente invitá na e promé reunion anual di Konseho di Bònt kual lo tuma lugá djaluna 29 di mart 2021 den Hòfi Kultural di 19.00 – 20.30. For di 18.45 bo ta bon biní.

Mi eksperensia komo miembro di direktiva di Unkobon
Eric Booi

Introdukshon
Medio oktober 2015 mi a wòrdu aserká telefónikamente pa señor Wietze Koopman ku e petishon ku si mi por pasa un ratu na su kas pa un kombersashon. Mi a sera konosí ku Wietze den aña 2007 siendo kliente di e banko na unda mi tabata empleá. For di e tempu ei mi no a topé nunka mas i pesei mi a keda asombrá ku e invitashon. Na momento di e yamada mi tabata okupá ku un otro asuntu di moda ku mi a aseptá e invitashon sin puntra pa e pakiko. Den e tempu ei tabata kore e rumor ku un tal Koopman lo bai bira direktor di e fundashon unda mi tabata empleá. Komo tal mi a pensa ku lo ta pa e motibu ei.

E kombersashon sinembargo a bai tokante un organisashon yamá Unkobon i ku é komo kordinadó i presidente di Bondsraad di e organisashon ta buskando un miembro pa forma parti di e direktiva di Unkobon kual a keda ampliá resientemente ku tres persona.
Despues di a skucha e historia di Unkobon mi a keda fasiná ku meta y reto di e organisashon. Komo tal mi a aseptá pa okupá un funshon boluntario den direktiva. Pa haña sa mas di e trabou ku tabata sperámi mi a pasa informalmente un periodo kòrtiku den direktiva. Fin di november 2015 mi a wòrdu nombrá ofisialmente.

Eksperensia
Dia mi a bira ofisialmente miembro di direktiva e direktiva tabata konsistí solamente di e tesorero señor Eelco Moolenburgh. A puntrámi si mi kier a okupá e funshon di sekretario. Mi a okupá e funshon aki te ku mei 2018. Fin di mei 2018 mi a wòrdu nombrá presidente di Unkobon pero alabes mi a sigui hasi e trabou di sekeretario. Fin di yuni 2020 direktiva a wòrdu ampliá ku señora Marianne Grutters. Marianne a bai okupá e funshon di sekretario y ta hasiendo esaki ekselentemente.

Durante e sinku añanan aki mi a eksperenshá i siña mashá hopi. Por ehempel: traha kontakto òf forma un netwerk ta sumamente importante den kaso si bo kier logra algu. Den kombersashon ku dirihentenan bo ta siña kiko ta pasando i pakiko kosnan ta bayendo manera nan ta andando. Loke tambe mi a siña ta ku den e kombersahonnan aki no mester kritiká so sino tambe presentá un proposishon kon yega na un solushon na interes di e konsumidónan aki na Boneiru. Asina esnan konserní lo skuchábo.

Kaminda pa un temporada largu di mi bida mi a tenémi den back ground mi a bin siña pa presentá den publiko. Mi yunan a keda sumamente asombrá ku esaki.

Komo presidente di Unkobon mi a partisipá na reunionnan ku: Gezaghebber, Kolegio Ehekutivo di Boneiru, direktiva di kompanianan di gobiernu, tòpambtenarnan di Hulanda, representante di Reino i tambe ku dos diferente sekretario di estado. Pa nan Unkobon ta un organisashon serio i ku kual por deliberá i komuniká bon riba diferente tópiko.

Mi idioma materno ta papiamentu. Mi a nota ku hopi biaha mi ta tin difikultat pa sigui kombersashonnan kompliká na hulandes. Menos mal ku Unkobon tin ekspertonan hulandes ku sí ta komprendé bon e uzo di loke ta wòrdu yamá “ambtelijke taal”.
Si mi mira bèk mi ta sospechá ku e problema di komunikashon na hulandes aki, t’ei serka mas boneriano ku ta hiba kombersashonnan ku e hulandesnan oropeo. Esaki lo por tin konsekuensia desbentahoso pa Boneiru.

Loke mas mi a gusta ta e “team work” den direktiva. E ambiente ta bon, no solamente al kaso. Tur opinion ta wòrdu respetá. Pa amplia e bon ambiente a kambia e reunionnan semanal di den oranan di mainta pa oranan di atardi di moda ku despues di reunion por a keda un ratu mas huntu saboriando un òf mas serbes i sigui deliberá riba diferente puntonan di interes.

Un di mi tareanan den direktiva tabata di tradusí na papiamentu e buletinnan mensual di Unkobon, relatonan di prensa y korespondensianan. Na momentu ku un relato ta kontené hopi palabra tekniko esaki pa ami tabata hopi fastioso. Esaki si no tabata agradabel pero ta parti di e reto. Mi lo kontinuá hasi e trabou di tradukshon pa Unkobon.

Nos a logra hopi den e ultimo sinku añanan aki. Ora mi topa y kombersá ku hendenan lokal nan ta elogiá e akshonnan di Unkobon. Pero ora puntranan pa bira miembro nan ta bula pipa. Pa ami esaki tabata e desapuntu di mas grandi durante mi periodo den direktiva di Unkobon. Apesar di tur e eksito i logronan na interes di e konsumidónan di Boneiru e kantidat di miembro di Unkobon a subi apenas.

Despedida
E motibu ku mi ta baha komo presidente di Unkobon ta ku mi a alkansá e edat di 75 aña i ku mi kier traha lugá pa boluntarionan mas hoben. Mi ta kier a probechá di e okashon aki pa gradisí Konseho di Supervishon, Bondsraad, e komishonnan di trabou i muy en espeshal mi miembronan di direktiva pa e periodo bonita y edukativo.

Pa mi susesor mi tin e siguiente konseho. Sigui kolaborá. No ta tur ora bo ta haña rason òf loke bo kier mira wòrdu hasí. Pero si bo ta haña esaki ta algu importante y na benefisio di e konsumidó, laga e sosegá un ratu i bin ku né atrobe i logra tòg loke bo tabata kier. Perkurá semper pa e bos boneriano sigui rezoná den Unkobon.

Unkobon a bolbe habri e kaso “kayanan di Boneiru”
Den luna di mart 2020 Unkobon a disidí pa no molestiá Kolegio Ehekutivo ku e asuntu di kayanan ku mester a wòrdu drechá y kual tabata den mal estado. Kolegio Ehekutivo ta tin su man yen ku e asuntu di Corona. Pero tur hende por a nota ku e drechamentu di kayanan den mal estado no ta tin progreso. Ta pa e motibu ei Unkobon a bolbe habri e kaso di kayanan di Boneiru.

Mientras tantu a sostené un reunion aklaratorio ku diputado James Kroon y tres ambtenar. Den e reunion ei Unkobon a buta infasis riba e echo ku awó si mester bin ku akshonnan konkreto den un término kòrtiku. Manera ta usual Unkobon no solamente a kritiká e maneho sino a indiká tambe kon y di ki manera por realisá akshonnan konkreto relashoná ku e kayanan. Den e siguiente reunion, ku e lider nobo di e proyekto”kayanan di Boneiru” lo bai papia y mira na ki manera Unkobon lo por sostené e proposishon proponé pa yega na un solushon duradero.