/
Den e buletin aki: di dos reunion general pa loke ta trata 2020, diskriminashon geográfiko di bankonan na Hulanda, programa radial relashoná ku e proyekto komparashon di preis
Di dos reunion general pa loke ta trata 2020 
Konseho di Bònt (Bondsraad) ta organisá dos biaha pa aña un reunion den kua tur miembro ta bon bini. Dia 2 di novèmber ku a pasa esaki a tuma lugá den Hòfi Kultural. A informá presentenan loke Unkobon a logra den 2020 y tambe riba kua tereno Unkobon tabata aktivo. Tópikonan manera kaya y kareteranan di Boneiru (wak e dossier di OLB riba nos wèbsait), preisnan di kombustibel (gasolin a baha ku 15 sèn pa liter entrante 1 di aprel 2020 y pa 1 di yuli ku 10 sèn), e kondishonnan general di WEB lo wòrdu ahustá den 2021, entregamentu di pòst (e ministerio pa asuntunan ekonómiko ta trahando aktivamente riba esaki), e etiketa riba produktonan di alimentu (nutri-score), e proyekto komparashon di preis a re-anudá fin di oktober 2020 y last but not least, planes pa bin ku un areglo di disputa. Un impresa òf kompania mester tin un bon areglo den su kondishon general pa atendé keho di kliente di moda ku e konsumidó por haña òf yega na su derecho muchu mas fasil.
Manera ta kostumber di tur di dos reunion general a skohe y definí, den konsulta ku e miembron, e eskohonan stratégiko pa e próksimo 3 aña. Tabata un reunion hopi ameno den kua e miembronan presente a partisipá aktivamente. Despues di e reunion a keda un ratu huntu pa kombèrsá gozando di un salú y snèk.
Diskriminashon geográfiko di bankonan na Hulanda 
Danki na Unkobon INGBank a hala’den su desishon pa kobra e klientenan ku tin kuenta serka nan y ku ta residensiá den islanan BES, un gastu ekstra. Pero e bankonan na Hulanda ta keda diskrimina.
Te ainda solamente kompania- y personanan privá ku ta tin un kuenta kaba na un banko na Hulanda y ku a muda bin islanan BES, por a mantené nan kuenta. Entrante 1 di yanuari 2021, konforme un reglamentu nobo, lo ta posibel pa bankonan na Hulanda por ofresé nan servisio na tur habitante di e islanan BES. E bankonan na Hulanda sinembargo no kier ekstendé nan servisio pafó di Hulanda. E banko di estado ABN AMRO hasta a menasá pa sera y/o kanselá tur kuenta èksistente di empresa- y personanan privá ku ta biba na islanan BES.
Solamente preshon polítiko por prevení esaki. Komo tal Unkobon a tuma e inisiativa pa huntu ku mas organisashon empresarial lokal y Kamara di Komersio, manda un karta urgente pa Tweede Kamer.
Programa radial relashoná ku e proyekto komparashon di preis
Entrante fin di dézèmber 2020 y siguidamente tur fin di luna den 2021 Unkobon lo presentá un programa na radio relashoná ku e proyekto komparashon di preis. E transmishon lo pasa na Bon FM, Live 99 y Voz di Boneiru. Bo por skucha e programa akinan.
Deseo pa un aña nobo
Direktiva di Unkobon ta deseá su miembronan un 2021 próspero, saludabel y yená ku hopi dicha y felisidat