Bonkompra

Dia 1 di yüli 2014 a inisiá un akshon, bou di e nòmber “Bon Kompra”, pa asina rebahá preis di un makutu ku 36 produkto básiko mas kumprá
y pa kual a keda palabrá un preis máksimo ku e 20 supermerkadonnan, ku ta miembro di e Organisashon di importadó y supermerkado bonairiano (VBIS). E miembronan aki mester a ofresé, di tur e 36 produktonan aki, por lo menos un marka di bon kalidat na òf bou di e preis máksimo palabrá.

Por a rekonosé e produktonan aki na un tarheta riba kual tabata menshoná Bon Kompra. Esaki tabata perkurá ku e konsumidó ta kumpra un produkto di kalidat na un preis abou. Na un kantidat di supermerkado, preis di e produktonan di Bon Kompra, tabata mas barata ku e preis máksimo.

Basá riba un komparashon di preis den luna di mei 2014 e makuto di Bon Kompra a mustra un bahada den preis di kasi 20%. E bahada di preis aki tabata diferenshá pa supermerkado. Dos supermerkado, den luna di mei 2014, a mantené e preis na òf abou di e preis máksimo. Na kuminsamentu di 2015 mas ku mitar di e 20 supermerkadonan partisipante tabata bende e makuto na òf bou di e preis máksimo.

E palabrashon tabata pa 6 luna. Pa falta di interes politiko esaki nunka a wòrdu prolongá. E organisashonnan pa konsumidó a keda sumamente desepshoná ora e inisiativa aki a muri un morto silensioso despues di e elekshon di 2015. For di e tempu ei Unkobon ku regularidat ta pleitando pa re-introdusí Bon Kompra.