Djasabra 29 di sèptèmber 2012 pa 10.00 or di mainta ta bai tuma lugá e reunion pa lanta Union di Konsumidó Boneiru (Unkobon).

Pakiko un Union di Konsumidó?

Na Boneiru nos ke mas kòntròl riba preisnan. Tambe nos ke mas transparensia den e manera ku ta yega na e preisnan. Bon mirá nos ke sa tur kos tokante kalkulashon di preisnan di kosto di bida i si eseinan ta sosodé na un manera hustu. Ta p’esei nos mester di un organisashon defensor ku ta independiente.

Hopi biaha nos ta tende ku konsumidónan na Boneiru no ta mashá konsiente di preisnan i no ta paga tinu riba kalidat i servisio. Tambe nos ta tende ku konsumidónan na Boneiru ta pasivo i dividí.

Nos, ku ta e personanan ku a tuma inisiativa pa lanta un Union di Konsumidó, no ta kere esei. Nos sa ku tin konsumidó konsiente na Boneiru i nos ta kere ku e konsumidónan ei por forma un Union di Konsumidó fuerte i konvensé otronan ku union ta hasi forsa. Un union di miembronan ku ta organisá i ku ta para firme tras di su metanan komun, no opstante diferensia di opinion den polítika, religion òf filosofia di bida. Nos ta konvensí ku un ambiente, kaminda ta stimulá inisiativa i ta mustra rèspèt i apresio pa un i tur, lo motivá mas i mas konsumidónan na Boneiru pa tambe bira aktivo i tuma inisiativa pa logra kambionan i desaroyonan positivo.

For di 1999 nos tin Fundashon Tienda pa Konsumidó na Boneiru. E fundashon ta hasi un bon trabou ku komparashon i registrashon di  preisnan i publikashonnan di nan sifranan regularmente. Union di Konsumidó Boneiru lo bai traha estrechamente ku e fundashon aki. Tin sufisiente trabou pa hasi. Otro organisashonnan ku kua nos ta bai traha ta Consumentenbond di Hulanda i Fundashon pa Konsumidó di Kòrsou.

Nos a skohe pa lanta un union i no un fundashon, pasobra den un union e miembronan ta stipulá e maneho, pone prioridatnan, kontrolá i supervisá. Esei ta e mihó fórmula pa logra resultadonan. Na e enkuentro nos lo duna mas informashon di e sistema mas efisiente i efektivo pa organisá un union.

Via nos página di Facebook “ConsumentenBonaire” nos a hasi un sondeo pa haña sa kiko ta biba serka e konsumidó na Boneiru. Den mas o ménos un luna di tempu ya kaba e página aki tin mas ku mil miembro i hopi hende a i ta lesa e ponensianan i reakshonnan tokante múltiple tópikonan. Nos ta mira esaki komo un señal ku konsumidónan di Boneiru ta birando mas i mas konsiente, ta buska informashon i kier interkambiá i buska nan derecho.

Algun ehèmpel di asuntunan pa kua konsumidónan di Boneiru ta pidi atenshon:

• Preisnan di komestibel i otro produktonan . Merkado ta limitá i no tin sufisiente konkurensha na Boneiru. Preisnan ta haltu, inovashonnan ta kana pokopoko i kalidat di servisio hopi bia ta laga di deseá.
• Sektor finansiero. Tarifanan di bankonan hopi bia no ta masha kla, reinan dilanti di lokètnan ta largu. Ora kumpra muebel òf aparatonan pa paga na kuota serka negoshinan, interes ta hopi haltu.
• Energia i Awa. Ya kaba preis di koriente na Boneiru ta esun di mas haltu den Karibe. E notisia ku lo hisa preis di koriente muchu mas ainda a lanta hopi inkietut den nos komunidat.
• Telefòn, Televishon i Internèt. Komparashon di preis-kalidat-servisio ta nesesario.
• Lokèt pa Konsumidó.  Hopi habitante na Boneiru tin difikultat pa adaptá na e tantísimo kambionan den e struktura nobo. Nan mester kustumá ku asina tantu komunikashon por eskrito, nan no ta komprendé e tekstonan na hulandes mashá bon i nan no sa mas unda nan por akudí ku nan preguntanan i reklamonan.
• Instansianan ku outoridat ankrá den lei. Ta parse ku e diferente instansianan di gobièrnu di reino ku ta protehá interes di konsumidónan na Hulanda (por ehèmpel Consuwijzer i Nederlandse Mededingingsautoriteit) no ta konta pa Boneiru. Esaki no ta hustu ni deseabel.

Enkuentro pa lanta UNKOBON (Union di Konsumidó Boneiru).

E inisiadónan di Unkobon a prepará nan mes debidamente. No solamente a komuniká i interkambiá di idea ku Fundashon Tienda pa Konsumidó na Boneiru pero tambe ku Fundashon pa Konsumidó na Kòrsou i Consumentenbond na Hulanda. Tambe nos a hasi un bishita na notario pa haña konseho i pa sa e gastunan enbolbí ku lantamentu di un organisashon manera esaki. Awor nos ta kla pa e siguiente paso: lanta Unkobon! Pa hasi esei nos mester di bo yudansa; bin prepará pa bo skucha, hasi pregunta i bira miembro. Un union fuerte pa un Boneiru fuerte.

Djasabra 29 di sèptèmber 2012, 10.00 or di mainta na Jong Bonaire, nos tur huntu ta bai lanta Union di Konsumidó Boneiru (Unkobon).

Tur hende ta bonbiní. Un boka bisa otro. Trese bo famia, bisiña, amigu. Pa nos por haña un idea kuantu hende lo asistí, por fabor notifiká nos ku bo lo ta presente via       e-mail info@ConsumentenBonaire.com, via nos página riba Facebook: http://www.facebook.com/groups/ConsumentenBonaire/  òf via telefòn number 701 9797.